कालिकोट-कालिकोट जिल्लाको महावै गाउँपालिका जोड्ने पान्तडी पुल निर्माण कार्य ठप्प भएको भन्दै गाउँपालिकाले निर्माण कम्पनी र ठेकेदारलाई ताकेता गरेको छ। पुल निर्माणका लागि २०७७ सालमा ठेक्का पाएको महादेव खिम्ति जेभी निर्माण कम्पनी हालसम्म कुनै पनि काम नगरेको भन्दै गाउँपालिकाले लिखित पत्राचार गरेको छ।
गाउँपालिकाको कडा चेतावनी
गाउँपालिकाका अध्यक्ष खेम बहादुर सिंह (भिजन) ले ठेकेदार रवि सिंह निर्माण व्यवसायी संघका केन्द्रीय अध्यक्ष समेत रहेको जानकारी गराउँदै, यस्ता गैर-जिम्मेवार कामले राष्ट्रकै विकासमा असर पर्ने बताएका छन्। उनले बिना समन्वय म्याद थपको प्रक्रिया नगरी गाउँपालिकालाई मात्र बोधार्थ पत्राचार गर्नु निर्माण कार्यबाट पन्छिने मनसाय भएको संकेत भएको बताए। यदि पुल निर्माण कार्य तत्काल अघि नबढाएमा गाउँपालिकाले कानूनी प्रक्रिया अघि बढाउने चेतावनी दिएको छ।
फेडरल स्तरबाट पनि ताकेता
संघीय सडक सुपरिवेक्षण तथा अनुगमन कार्यालय, पुल सेक्टर नं ५ (सुर्खेत) ले पनि आयोजनाका लागि पटक–पटक मौखिक र लिखित पत्राचार गर्दा समेत निर्माण कार्यमा कुनै प्रगति नभएको जनाएको छ।
स्थानीयवासी र सम्बन्धित निकायले पुल निर्माण कार्य छिटो अघि बढाउन दबाब दिइरहेका छन्। यदि कम्पनीले थप ढिलाइ गरेमा कानूनी कारबाही हुने सम्भावना रहेको छ।
प्रतिक्रिया दिनुहोस्