२१ फागुन, काठमाडौं – नेपाल पत्रकार महासंघले पत्रकार किशोर श्रेष्ठ र प्रकाश ओलीको संघीय संसद् प्रवेश पास निलम्बन गरिएको घटनाप्रति गम्भीर ध्यानाकर्षण जनाएको छ। महासंघले आज एक प्रेस विज्ञप्ति जारी गर्दै पत्रकारलाई प्रश्न सोध्ने अधिकार सुनिश्चित हुनुपर्ने उल्लेख गर्दै संसद् सचिवालयको निर्णय फिर्ता लिन आग्रह गरेको छ।
महासंघका अनुसार यही फागुन ४ गते प्रतिनिधिसभा बैठकपछि बाहिरिँदै गरेका प्रधानमन्त्रीलाई प्रश्न गर्दा संसदीय मर्यादा उल्लङ्घन भएको आरोपमा संसद् सचिवालयले दुबै पत्रकारको पास निलम्बन गरेको हो। महासंघले पत्रकार आचारसंहिता प्रतिकूल भए/नभएको निर्धारण गर्ने अधिकार प्रेस काउन्सिल नेपालसँग रहेको स्मरण गराउँदै सचिवालयको निर्णय प्रेस स्वतन्त्रताविरोधी भएको जनाएको छ।
प्रेस स्वतन्त्रताको सम्मान गर्न आग्रह
महासंघले पत्रकारलाई स्वतन्त्र रूपमा आफ्नो पेशागत धर्म निर्वाह गर्ने वातावरण सुनिश्चित गर्नुपर्नेमा जोड दिँदै संसद् सचिवालयलाई निर्णय पुनरावलोकन गर्न आग्रह गरेको छ। साथै, महासंघले पत्रकार तथा सञ्चारमाध्यमलाई आचारसंहिताको पालना गर्दै जिम्मेवार पत्रकारितामा ध्यान दिन अनुरोध गरेको छ।
नेपाल पत्रकार महासंघले घटनाको गम्भीर समीक्षा गर्दै प्रेस स्वतन्त्रताको रक्षा गर्न आवश्यक कदम चाल्ने प्रतिबद्धता पनि व्यक्त गरेको छ।
प्रतिक्रिया दिनुहोस्